Лекцыі, майстар-класы і трэнінгі: праект «Жаночы Сусвет ГрДМУ» стартаваў з вялікім поспехам!

У Год беларускай жанчыны наш універсітэт запусціў маштабны агульнаўніверсітэцкі праект "Жаночы Сусвет ГрДМУ" – ініцыятыву для падтрымкі жанчын-супрацоўніц ВНУ ў іх прафесійным і асобасным развіцці.

Першая лекцыя на тэму "Чэк-ап 40+: лабараторны пошук энергіі і маладосці" ў рамках праекта прайшла з вялікім поспехам. Спікерам выступіла прарэктар па ідэалагічнай і выхаваўчай рабоце, кандыдат медыцынскіх навук, дацэнт, урач клінічнай лабараторнай дыягностыкі вышэйшай катэгорыі Ірына Андрэеўна Курстак – спецыяліст, чый вопыт і веды дазволілі раскрыць тэму максімальна глыбока і практычна.

– У рамках Года беларускай жанчыны ў нашым універсітэце праводзіцца вельмі шмат разнапланавых і карысных мерапрыемстваў, – адзначыла Ірына Андрэеўна. – На працягу года мы будзем праводзіць тэматычныя лекцыі, майстар-класы, трэнінгі. Вы можаце прыняць удзел у адкрытых дыялогах аб здароўі з практыкуючымі урачамі і кандыдатамі навук, атрымаць магчымасць развіць голас, дыкцыю і навыкі публічных выступаў на занятках па красамоўніцкаму майстэрству.

Таксама запланаваны трэнінг па дэфіле і танцавальны майстар-клас "Танцуй свабодна", які дапаможа разняволіцца, атрымаць зарад энергіі і атрымаць асалоду ад руху.

– Наша першая сустрэча прысвечана самаму каштоўнаму рэсурсу, што ў нас ёсць, – здароўю. Тэма "Чэк-ап 40+: лабараторны пошук энергіі і маладосці" з'яўляецца актуальнай і запатрабаванай. Існуе міф, што пакуль нічога не турбуе, абследавацца не трэба: калі нічога не баліць, значыць, усё нармальна. А насамрэч добры, дабраякасны чэк-ап – гэта уклад у будучыню, інвестыцыя ў будучыню.

Лекцыя была падзелена на тэматычныя блокі. Спачатку разабралі, якія паказчыкі сапраўды важныя для жанчын пасля 40. На экране з'явіліся лічбы – нормы глюкозы, гемаглабіну, халестэрыну, ТТГ і іншых – і адразу ж лектар растлумачыла, што значаць адхіленні. На практычных прыкладах Ірына Андрэеўна паказала, як "чытаць" аналізы, не панікуючы з-за кожнай лічбы. Растлумачыла, якія даследаванні патрэбныя ўсім штогод (гэта базавы чэк-ап), якія варта рабіць радзей, а якія – толькі пры пэўных сімптомах.

У завяршэнне спікер адзначыла ключавыя фактары падтрымання здароўя: рэгулярную фізічную актыўнасць, кантроль стрэсу, збалансаванае харчаванне і штогадовы прафілактычны агляд.

«Жаночы Сусвет ГрДМУ» – гэта ўнікальны праект. Яго галоўная мэта – стварыць прастору для гарманічнага развіцця, прафесійнага росту і душэўнай раўнавагі жанчын нашага універсітэта. Ініцыятыва заклікана паказаць, што клопат аб сабе – не раскоша, а важная частка паўнавартаснага жыцця, нават пры шчыльным графіку.

Матэрыял падрыхтаваў аддзел па сувязях з грамадскасцю

Фота: Таццяна Вялёнда