Памяць праз гады. У ГрДМУ прайшоў круглы стол, прысвечаны 83-й гадавіне Хатынскай трагедыі

22 сакавіка 1943 года была знішчана вёска Хатынь. Ад рук нацыстаў загінулі 149 чалавек, у тым ліку 75 дзяцей ва ўзросце да 16 гадоў. Гэтая трагедыя – адзін з сімвалаў генацыду беларускага народа ў гады Вялікай Айчыннай вайны.

У Гродзенскім дзяржаўным медыцынскім універсітэце адбыўся круглы стол “Хатынь. Жанчыны агню і попелу: святло непагаснай свечкі. Подзвіг маці, жыццё, якое перамагло смерць», прымеркаваны да 83-й гадавіны Хатынскай трагедыі. У мерапрыемстве прынялі ўдзел кіраўніцтва, супрацоўнікі і студэнты ВНУ. Арганізатарам выступіў грамадзянска-патрыятычны клуб ГрДМУ.

З прывітальным словам да прысутных звярнуўся загадчык кафедры сацыяльна-гуманітарных навук Сяргей Анатольевіч Сіткевіч. Ён нагадаў, што ў 2021 годзе ў Беларусі была ўзбуджана крымінальная справа па факце генацыду насельніцтва краіны ў перыяд Вялікай Айчыннай вайны і пасляваенны час.

– Цяпер устаноўлена, што было знішчана 12 868 населеных пунктаў, – адзначыў Сяргей Анатольевіч. – Страшную долю Хатыні зведалі 290 вёсак. Нядаўна ў Канстытуцыю былі ўнесены змены: артыкул 15 гарантуе захаванне гістарычнай памяці. Гэты ключавы накірунак працы нашага грамадзянска-патрыятычнага клуба, які штогод праводзіць тэматычныя мерапрыемствы.

Праграма круглага стала складалася з тэматычных блокаў. Удзельнікі ўспомнілі тых, хто сутыкнуўся тварам да твару з жахамі вайны, але выжыў у страшнай Хатынскай трагедыі, знайшоў у сабе сілы жыць далей і перадаваць памяць аб трагедыі наступным пакаленням.

Асаблівую ўвагу ў Год беларускай жанчыны надалі подзвігу жанчын – удзельніц партызанскага руху, разведчыц, працаўніц тылу. Яны не толькі ваявалі на фронце і дапамагалі партызанам, але і аднаўлялі разбураныя гарады, выхоўвалі дзяцей, захоўвалі сямейныя традыцыі ў найцяжэйшых умовах.

Асобны акцэнт быў зроблены на ролі жанчын-урачоў і медсясцёр. У гады Вялікай Айчыннай вайны яны праводзілі аперацыі пад абстрэламі, ратавалі параненых у акопах і шпіталях, часта рызыкуючы ўласнымі жыццямі. Іх самаадданасць і прафесіяналізм сталі неад’емнай часткай агульнай перамогі.

Усе выступленні суправаджаліся тэматычнымі відэазапісамі: на экране дэманстраваліся дакументальныя кадры часоў Вялікай Айчыннай вайны, архіўныя фатаграфіі, фрагменты хронікі, звязаныя з Хатынскай трагедыяй і подзвігам беларускага народа. Відэазапісы дапамоглі глыбей адчуць маштаб трагедыі і аддаць даніну павагі тым, хто прайшоў праз жахі вайны.

Удзельнікі круглага стала хвілінай маўчання ўшанавалі памяць ахвяр трагедыі ў Хатыні і ахвяр генацыду беларускага народа.

Матэрыял падрыхтаваў аддзел па сувязях з грамадскасцю

Фота: Таццяна Вялёнда