Студентам Студенческая жизнь

ЛІТАРАТУРНЫ КЛУБ “КАТАРСІС”

Нягледзячы на тое, што дваццаць першае стагоддзе – час прагматычных тэхнакратаў і нанатэхналогій, ёсць у ім месца і літаратуры, жывапісу, музыцы. Сучасны чалавек не можа назваць своё жыццё паўнавартасным без адвечных духоўных каштоўнасцяў. І вельмі прыемна адзначыць, што студэнты-медыкі арганічна сумяшчаюць у сабе практыцызм будучай прафесіі і мастацкія скарбы духоўнага жыцця. І дапамагае ім у гэтым адзінае на Гродзеншчыне і ў медыцынскіх ВНУ Беларусі літаратурнае аб’яднанне клуб “Катарсіс” Гродзенскага дзяржаўнага медыцынскага ўніверсітэта.

А пачалося ўсё ў далёкім 1999 годзе, калі ў адной з  аўдыторый Гродзенскага медыцынскага інстытута сабраліся сямёра студэнтаў і два выкладчыкі і вырашылі стварыць літаратурны клуб, каб было дзе апрабіраваць свае вершы і прозу на слухачах, паслухаць іншых аўтараў, абмеркаваць тыя ці іншыя літаратурныя навінкі. Так нарадзіўся літаратурны клуб і тут жа абзавёўся першай легендай. Паколькі назва клуба не прыдумвалася, вырашылі адкласці гэтае пытанне на потым. А пакуль проста пачытаць свае вершы, паспрачацца па пытаннях літаратуры. І так усім гэты працэс спадабаўся, што, ужо разыходзячыся, нехта з задавальненнем вымавіў:

- Як жа добра пасядзелі! Проста катарсіс душэўны.

Вось тут усе і зразумелі: наша назва! З таго дня клуб і называецца “Катарсіс”. Кіраўніком клуба быў абраны старшы выкладчык кафедры рускай і беларускай моў Варанец Віктар Іванавіч. Інфармацыя пра клуб хутка распаўсюдзілася па ўсім універсітэце, і неўзабаве на пасяджэнні сталі збірацца больш за дваццаць чалавек. Ужо праз год выдалі свой першы зборнік вершаў «Вечные каникулы». Так пачыналася гісторыя клуба.

Сёння «Катарсіс»  - адно з наймацнейшых і найвядомейшых літаратурных аб’яднанняў у Беларусі. У яго склад уваходзяць як студэнты, так і выкладчыкі Гродзенскага медыцынскага ўніверсітэта. Досыць часта прыходзяць са сваімі творамі або дасылаюць па пошце на рэцэнзію і аўтары з іншых навучальных устаноў горада і вобласці. За час свайго існавання сіламі клуба і пры падтрымцы кіраўніцтва УА «Гродзенскі дзяржаўны медыцынскі ўніверсітэт» былі выдадзены калектыўныя зборнікі вершаў і прозы “Гіпакратавы ваганты”, “Вечар пятніцы”, “Менестрэлі Асклепія”, “Глыток натхнення”. Свае творы сябры клуба друкуюць на старонках газет “Эскулап”, “Вячэрні Гродна”, “Літаратура і мастацтва”, у часопісе “Маладосць”, “Полымя”, “Западная Двина”.

Актыўна ўдзельнічаюць нашы паэты і празаікі ў розных літаратурных конкурсах. І робяць гэта паспяхова. Так, пачынаючы з 2012 года мы прымаем удзел у самым прэстыжным Рэспубліканскім літаратурным конкурсе «Аўтограф» сярод студэнтаў вышэйшых навучальных устаноў Беларусі. Конкурс праводзіцца раз на два гады. Толькі на апошнім конкурсе “Аўтограф-2022” нашы маладыя літаратары атрымалі 24 дыпломы пераможцаў і прызёраў у розных намінацыях. (далее удалено)

Праводзім мы штогод адкрыты літаратурны конкурс клуба «Катарсіс», у якім удзельнічаюць паэты і празаікі з розных куткоў Беларусі, а таксама з Польшчы, Германіі. Сябры клуба часта выступаюць як у сценах роднага ўніверсітэта, так і ў іншых установах і арганізацыях Гродна. Падтрымліваюцца цесныя сувязі з музеем Максіма Багдановіча, абласной бібліятэкай імя Я.Карскага. Клуб штогод праводзіць розныя літаратурна-творчыя мерапрыемствы: “Літрэкс”, “Літаратурны Гродна”, “У пошуках рыфмы” і інш. Наладжана супрацоўніцтва з Гродзенскім аддзяленнем Саюза пісьменнікаў Беларусі. Створаны некалькі відэафільмаў пра дзейнасць клуба «Катарсіс», які з цікавасцю глядзяць студэнты і школьнікі. Клуб актыўна прымае ўдзел у рэспубліканскіх і абласных мерапрыемствах: Дзень беларускага пісьменства ў Слоніме, Гродзенскі літфэст, абараняе гонар Гродзеншчыны на конкурсе маладых паэтаў Беларусі.

 Клуб «Катарсіс» працягвае сваё існаванне. Штогод нашы рады папаўняюць таленавітыя першакурснікі, рэалізуюцца новыя планы і задумкі. Хацелася б звярнуцца да ўсіх жадаючых усталяваць кантакт з нашым клубам. Пішыце на адрас katarsis@grsmu.by. Мы заўсёды рады новым сябрам!

Кіраўнік літаратурнага клуба «Катарсіс»

Варанец Віктар Іванавіч